नवी दिल्ली : वादाच्या भोवऱ्यात सापडलेले मुंबई एनसीबीचे प्रादेशिक संचालक समीर वानखेडे यांनी सोमवारी दिल्लीत येऊन त्यांच्या जात प्रमाणपत्राशी संबंधित सारी कागदपत्रे राष्ट्रीय अनुसूचित जाती आयोगाचे अध्यक्ष विजय सांपला यांना सादर केली. वानखेडे यांनी सादर केलेला दस्तावेज महाराष्ट्र सरकारकडे पडताळणीसाठी पाठविण्याचे आदेश देण्यात आले असून, ती खरी निघाल्यास वानखेडे यांच्यावर कोणतीही कारवाई होणार नाही, असे सांपला यांनी स्पष्ट केले.

सोमवारी सकाळी दिल्लीत पोहोचून समीर वानखेडे यांनी राष्ट्रीय अनुसूचित जाती आयोगापुढे सर्व आवश्यक दस्तावेजासह आपली बाजू मांडली. आयोगाने मागितलेली सर्व कागदपत्रे आपण सादर केली असून त्यांच्या पडताळणीनंतर आयोग आपला अहवाल देईल, असे वानखेडे यांनी सांगितले. वानखेडे यांनी धर्म बदलून नोकरी मिळविल्याचा आरोप राज्याचे अल्पसंख्याक कल्याणमंत्री नवाब मलिक यांनी केला असून, त्याविरुद्ध वानखेडे यांनी राष्ट्रीय अनुसूचित जाती आयोगाकडे तक्रार नोंदविली होती.

Uttar Pradesh: देशातील ४६ रेल्वे स्टेशन्स बॉम्बस्फोटात उडवण्याची धमकी, अलर्ट जारी
Munawar Faruqui: तीनदा सीम बदललं, धमक्या रोजच्याच : कॉमेडीयन मुनव्वर फारुकी

समीर वानखेडे यांनी आयोगापुढे आपले जात प्रमाणपत्र, पहिल्या पत्नीपासून जन्मलेल्या मुलाचे जन्म प्रमाणपत्र आणि घटस्फोटाशी संबंधित कागदपत्रे सोपविली. आपल्याला त्रस्त केले जात असून एखाद्या खोट्या प्रकरणात अडकविण्याचा प्रयत्न केला जात असल्याचा आरोप वानखेडे यांनी आयोगापुढे केला. या संबंधात आयोगाने २९ ऑक्टोबर रोजी महाराष्ट्राचे मुख्य सचिव, पोलिस महासंचालक आणि पोलिस आयुक्तांना नोटीस पाठवून सात दिवसांच्या आत सर्व माहिती मागितली आहे. वानखेडे यांच्या जातीशी संबंधित माहिती अपूर्ण आहे किंवा ती उपलब्ध केली गेली नाही तर समिती स्थापन करून चौकशी करण्याचे अधिकार आयोगाला आहेत. वानखेडे यांनी सादर केलेली कागदपत्रे खरी निघाल्यास त्यांच्या अधिकारांचे रक्षण सुनिश्चित केले जाईल, असे सांपला यांनी सांगितले.

priyanka gandhi arrest : प्रियांका गांधींना रात्रीच्या वेळी अटक; यूपीच्या ‘त्या’ पोलीस अधिकाऱ्यांवर गुन्हा दाखल

‘चाट पे चर्चा’ : अखिलेश यांच्यासोबतचं विमान सोडून प्रियांकांसोबत RLD नेते चौधरी दिल्लीत