मुंबई: आर्यन खान प्रकरणात (Aryan Khan Case) बोगस कारवाई व खंडणीच्या आरोपांमुळं वादात अडकलेले एनसीबीचे मुंबई विभागीय संचालक समीर वानखेडे (Sameer Wankhede) दिवसेंदिवस संशयाच्या भोवऱ्यात अडकत आहेत. वानखेडे हे मुस्लिम कुटुंब आहे, असा आरोप करत राष्ट्रवादी काँग्रेसचे नेते नवाब मलिक यांनी काही पुरावे सादर केले होते. हा आरोप समीर वानखेडे व त्यांच्या कुटुंबीयांनी फेटाळला होता. मात्र, आता समीर वानखेडे यांचे पहिले सासरे डॉ. झाहिद कुरेशी (Dr. Zahid Qureshi) यांनी धक्कादायक खुलासा केला आहे.

समीर वानखेडे यांचं पहिलं लग्न शबाना कुरेशी यांच्याशी झालं होतं. काही काळानंतर त्यांचा घटस्फोट झाला होता. आता समीर यांच्या धार्मिक पार्श्वभूमीचा मुद्दा चर्चेला आल्यानंतर शबाना यांचे वडील झाहिद कुरेशी प्रथमच समोर आले आहेत. त्यांनी वानखेडे कुटुंबाविषयी माहिती दिली आहे.

वाचा: आर्यन खानला दोन वर्षांपासून ड्रग्जचं व्यसन; एनसीबीचा कोर्टात दावा

झाहिद कुरेशी म्हणाले, ‘माझ्या मुलीचं लग्न हे काही लव्ह मॅरेज नव्हतं, अॅरेंज मॅरेज होतं. लग्नाच्या आधी तीन ते चार वर्षे आम्ही वानखेडे कुटुंबाला ओळखत होतो. हे संपूर्ण कुटुंब मुस्लिम आहे. त्यांच्या घरात सगळं काही मुस्लिम रितीरिवाजानुसारच चालायचं. हिंदू कुटुंब असतं तर आम्ही लग्नच केलं नसतं.’

‘समीर वानखेडे यांचे वडील ‘दाऊद’ म्हणूनच आम्हाला माहीत होते. ते आमच्याकडं मुस्लिम म्हणूनच ते आले होते. हिंदू म्हणून कधी आलेच नव्हते. तेव्हा समीर यूपीएससीची परीक्षा देत होते. मशिदीत जायचे. या पलीकडं आम्हाला काही माहीत नव्हतं. त्यांनी नोकरी कशी मिळवली? कुठली सर्टिफिकेट दाखवली? याच्याशी आमचा काहीच संबंध नव्हता. इतकी खोलवर चौकशी कोणी कशाला करेल?,’ असा प्रश्नही झाहिद कुरेशी यांनी केला.

वाचा: क्रांती रेडकर यांनी सांभाळून बोलावं, इतिहास काढला तर… आव्हाड यांचा इशारा

‘वानखेडे कुटुंब हिंदू आहे हे मला आता बातम्यांमधून कळतंय. हिंदू असताना मुलीचं लग्न तुम्ही कसं केलं असं विचारलं जाईल म्हणून मी खुलासा करतोय. घटस्फोटाचं दु:ख आम्ही आता विसरून गेलोय. आम्ही कधी आमच्या दु:खाचं प्रदर्शन केलेलं नाही,’ असं ते म्हणाले.

समीर वानखेडे यांचे वडील स्वत:ला ज्ञानदेव वानखेडे असल्याचं सांगताहेत. शाळेचा दाखला दाखवताहेत, याबाबत विचारलं असता झाहिद कुरेशी म्हणाले, ‘शाळेचा दाखला हा आधीचा असावा. समीरच्या आईशी लग्न केल्यानंतर ते मुस्लिम झाले होते. दाऊद झाले होते. तसं नसतं तर त्यांचंही लग्न झालं नसतं आणि आम्ही त्यांना मुस्लिम म्हणूनच ओळखत होतो. ते स्वत:ला हिंदू म्हणत असतील तर लग्न झाल्यानंतरची सर्टिफिकेट ते का दाखवत नाहीत?,’ असा सवालही त्यांनी केला.

वाचा: समीर वानखेडेंची चौकशी सुरू असतानाच जयंत पाटील यांचं मोठं विधान

नवाब मलिक किंवा समीर वानखेडे यांच्या वादात आता आम्हाला कसलाही रस नाही. केवळ माझी बाजू मांडण्यासाठी म्हणून मी आज बोलतोय. आम्हाला या विषयावर काहीही म्हणायचं नाही. कुणावरही कसलीही कारवाई करायची नाही,’ असंही त्यांनी स्पष्ट केलं.