शेवटच्या षटकात अफलातून थरार; गोलंदाजाने घेतल्या ५ चेंडूत ५ विकेट, फक्त एका धावेने जिंकला सामना


नवी दिल्ली : टी-२० विश्वचषक २०२१ची रणधुमाळी सुरू असताना एका महिला गोलंदाजाने क्रिकेटच्या मैदानात धुमाकूळ घातला आहे. या खेळाडूने शेवटच्या षटकात गोलंदाजी करताना सलग पाच चेंडूंमध्ये पाच फलंदाज बाद केले आहेत. यासह तिने हॅट्ट्रिकही पूर्ण केली. याच्या बळावर फलंदाजी करणाऱ्या संघाला एका धावेने सामना गमवावा लागला. ब्राझील आणि कॅनडा देशांच्या महिला संघांमध्ये आयसीसी महिला टी-२० विश्वचषकाच्या यूएस विभागातील पात्रता सामना सुरू होता. ब्राझीलच्या लॉरा कार्डोसोच्या षटकातील सहापैकी पाच चेंडूवर हा प्रकार घडला.

हा सामना २० षटकांचा असला तरी पावसामुळे १७-१७ षटकांचा खेळविण्यात आला. ब्राझील महिला क्रिकेट संघाने पहिल्यांदा फलंदाजी करताना सात गडी गमावून ४८ धावा केल्या. त्यांच्याकडून कर्णधार रॉबर्टा एव्हरीने सर्वाधिक २१ धावा केल्या. इतर कोणीही दुहेरी आकडा गाठू शकले नाहीत. कॅनडाच्या महिला संघासाठी हिबा शमसादने चार षटके टाकताना आठ धावांत तीन गडी बाद केले. त्याचवेळी अजमतने ११ धावांत दोन गडी बाद केले. ब्राझीलच्या संपूर्ण डावातील दोन चौकार कर्णधार रॉबर्टा एव्हरीने लगावले होते. कॅनडाला सामना जिंकण्यासाठी ४९ धावांचे लक्ष्य मिळाले होते.

लक्ष्याचा पाठलाग करताना कॅनडाची अवस्थाही खराब झाली होती. त्यांच्या संघातील एकमेव फलंदाज मुखविंदर गिलने दुहेरी आकडा गाठता होता. गिलने १९ धावा केल्या. कॅनडाने १९ धावांतच पाच विकेट गमावल्या होत्या. पण मुखविंदर गिलने एका बाजूने किल्ला लढवला होता. १६ षटकांनंतर कॅनडाची धावसंख्या पाच बाद ४६ अशी होती. शेवटच्या षटकात कॅनडाला विजयासाठी फक्त तीन धावा हव्या होत्या आणि त्यांच्या पाच विकेट्स शिल्लक होत्या.

ब्राझीलकडून लॉरा कार्डोसो शेवटचे षटक टाकण्यासाठी पुढे आली. यापूर्वी तिने दोन षटके गोलंदाजी करताना सात धावा दिल्या होत्या. पण एकही विकेट मिळाली नव्हती. मुखविंदर गिलने शेवटच्या षटकातील पहिला चेंडू खेळला, पण तिला एकही धाव मिळाली नाही. दुसऱ्या चेंडूवर तिने धाव घेण्याचा प्रयत्न केला, पण क्रमा कपाडिया धावबाद झाली. तिसऱ्या चेंडूवर हाला अजमत आणि चौथ्या चेंडूवर हिबा शमशाद बाद झाली. पाचव्या चेंडूवर सना जफरने ब्राझीलची कर्णधार रॉबर्टा एव्हरीचा झेल घेतला. अशा प्रकारे लॉराची हॅट्ट्रिक झाली. तसेच षटकात चार विकेट पडल्या, पण एकही धाव झाली नाही. शेवटच्या चेंडूवर मुखविंदर गिलने धाव घेण्याचा प्रयत्न केला, पण तीही दुसरी धाव घेण्याच्या प्रयत्नात धावबाद झाली. अशाप्रकारे ब्राझीलने हातातून गेलेला सामना एका धावेने जिंकला.

लॉरा कार्डोसोने सामन्यात तीन षटकात एक निर्धाव षटक टाकताना आठ धावा देत तीन बळी घेतले. तिने संघाला एका धावेने रोमहर्षक विजय मिळवून दिला. ब्राझीलने क्वालिफायरमधील सहा पैकी चार सामने जिंकले. लॉरा कार्डोसोने सहा सामन्यात ११ विकेट घेतल्या. विकेट घेण्यात ती आघाडीवर होती. कॅनडाचे पाच फलंदाज ५ चेंडूत बाद झाले आणि एका षटकात सर्वाधिक खेळाडू बाद होण्याचा विक्रम ठरला. ब्राझीलची कर्णधार रॉबर्टा एव्हरीने महिला विश्वचषकाच्या पात्रता फेरीत संघाचे शानदार नेतृत्व केले आहे. ब्राझील संघाशी संबंधित अपडेट्सबाबत ती सोशल मीडियावर सतत सक्रिय असते.



Source link

Leave a Reply

Your email address will not be published. Required fields are marked *

%d bloggers like this: