दुबई: भारत आणि पाकिस्तान यांच्यात टी-२० वर्ल्डकपमधील लढतीची प्रतिक्षा आता संपत आली आहे. २४ ऑक्टोबर म्हणजे दोन दिवसांनी ही हाय व्होलटेज लढत होणार आहे. एका बाजूला भारताचा कर्णधार विराट कोहली तर दुसऱ्या बाजूला पाकिस्तानचा कर्णधार बाबर आझम या दोघात नेतृत्वाची लढाई असेल. भारत वर्ल्डकपमध्ये पाकिस्तानविरुद्ध कधीच पराभूत झालेला नाही. टी-२० वर्ल्डकपमध्ये तर पाच वेळा त्यांना पराभूत केले आहे. अशात विराटला हा इतिहास कायम ठेवण्याचे आव्हान असेल तर बाबरला आजवर जे शक्य झाले नाही ती कामगिरी करून दाखवावी लागणार आहे.

दोन्ही संघात फक्त आयसीसीच्या स्पर्धांमध्ये लढत होत असल्याने या लढतीची उत्सुकता देखील वाढली आहे. टी-२० वर्ल्डकपच्या इतिहासात भारताने याआधी पाचही लढतीत पाकिस्तानचा पराभव केला आहे. आता या वर्षी विजयाचा षटकार मारण्यात भारतीय संघ उत्सुक असेल आणि चाहत्यांची देखील तशीच इच्छा असेल. फक्त ४८ तासांवर आलेल्या या लढतीच्या आधी जाणून घेऊयात दोन्ही संघाच्या कर्णधारांची बलस्थाने आणि कमकुवत बाजू….

टी-२० मधील रेकॉर्ड

विराट कोहली
सामने-४५
विजय-२७
पराभव- १४
टाय-२
निकाल नाही- २
विजयाची टक्केवारी- ६५.११

बाबर आझम
सामने-२८
विजय-१५
पराभव- ८
टाय-०
निकाल नाही- ०
विजयाची टक्केवारी- ६५.२१

आंतरराष्ट्रीय करीअर

विराट कोहली- भारतीय कर्णधार विराट कोहली हा किंग आहे. त्याच्या नावावर सध्या सर्वाधिक धावा आणि सर्वाधिक अर्धशतकांचा विक्रम आहे. विराटने एकापाठोपाठ एक क्रिकेटमधील मोठे विक्रम स्वत:च्या नावावर केले आहेत. जोपर्यंत तो मैदानावर असतो तोपर्यंत प्रतिस्पर्धी संघातील गोलंदाज दबावात असतात. त्याने ९० सामन्यात २८ अर्धशतकांसह ३ हजार १५९ धावा केल्या आहेत. त्याची सरासरी ५२.६५ तर स्ट्राइक रेट १३९.०४ इतका आहे.

बाबर आझम- पाकिस्तानकडून आंतरराष्ट्रीय टी-२० क्रिकेटमध्ये सर्वात यशस्वी फलंदाज अशी बाबरची ओळख आहे. त्याने ६१ सामन्यात ४६.८९च्या सरासरीने २ हजार २०४ धावा केल्या आहेत. त्याच्या नावावर १ शतक आणि २२ अर्धशतक आहेत. त्याचा स्ट्राइक रेट १३०.६४ इतका आहे.

ताकद

विराट कोहली- पाकिस्तानविरुद्ध विराटचे रेकॉर्ड जबरदस्त आहे. गेल्या ३ टी-२० सामन्यात पाकिस्तानच्या गोलंदाजांना विराटला बाद करता आले नाही. विराट हा मोठ्या सामन्यातील खेळाडू मानला जातो. प्रतिस्पर्धी संघ जर पाकिस्तान असेल तर त्याची आक्रमकता आणखी वाढते. चाहत्यांना देखील विराटची ही आक्रमकता आवडते.

बाबर आझम- स्ट्रोकिंग प्लेअर अशी बाबरची ओळख आहे. त्याला मोठ्या संघांविरुद्ध फार संधी मिळाली नाही. पण शॉट सिलेक्शन बाबत त्याची तुलना विराटशी केली जाते. कव्हर ड्राइव्हच्या बाबत काही जण त्याला विराट पेक्षा चांगला मानतात. कर्णधारपदाच्या काळात त्याची कामगिरी चांगली झाली आहे.

कमकुवत बाजू

विराट कोहली- आंतरराष्ट्रीय स्तरावर गेल्या दोन वर्षात विराटला मोठी धावसंख्या करता आलेली नाही. पण आयपीएलच्या १४व्या हंगामात त्याने चांगली कामगिरी केली आहे. त्यामुळे आता आंतरराष्ट्रीय स्तरावर तशीच कामगिरी करण्याची आशा आहे.

बाबर आझम- टी-२० मध्ये प्रथमच भारताविरुद्ध खेळत आहे. या सामन्यातील प्रेशर तो किती पेलतो त्यावर सर्व ठरणार आहे. भारताविरुद्ध त्याने ५ वनडे सामने खेळले आहेत त्यात त्याला अर्धशतक देखील करता आलेले नाही.

एक्स फॅक्टर

विराट कोहली- रोहित शर्माची साथ हा विराट कोहलीसाठी एक्स फॅक्टर ठरू शकतो. तो फक्त फलंदाजीद्वारे नाही तर सल्ल्याच्या माध्यमातून देखील विराटला मदत करेल. त्याच्या कर्णधारपदाचा अनुभव भारतीय संघाला उपयोगी पडणार आहे.

बाबर आझम- मोहम्मद रिझवानचा फॉर्म बाबर साठी मोठा दिलासा ठरू शकतो. त्याच बरोबर विकेटकिपर म्हणून देखील तो चांगली कामगिरी करत आहे. जर रिझवान चालला तर पाकिस्तान मोठी धावसंख्या उभी करू शकतो. त्याची टी-२०मधील सरासरी ४८ इतकी आहे.