Power Cut: राज्यातील ‘या’ जिल्ह्यात खळबळ; अचानक वीज कापल्याने शहरासह अनेक गावे अंधारात


हायलाइट्स:

  • थकबाकी वसुलीसाठी वीज वितरण कंपनीची कठोर पावले.
  • कर्जत तालुक्यात गावांच्या पाणी योजनांचीही वीज तोडली.
  • पथदिव्यांची वीज तोडल्याने शहराचा बहुतांश भागही अंधारात.

अहमदनगर : कोळसा टंचाईचे संकट गहिरे झाल्याने राज्यात वीज कपातीची टांगती तलवार आहेच. अशा परिस्थितीत थकबाकी वसुलीसाठी वीज वितरण कंपनीने आता शेतकऱ्यांची आणि गावांचीही वीज तोडण्याची मोहीम हाती घेतली आहे. कर्जत तालुक्यात काही शेतकऱ्यांची तसेच गावांच्या पाणी योजनांचीही वीज तोडण्यात आली आहे. यामुळे शेतकऱ्यांनी संताप व्यक्त केला आहे. भारतीय जनता पक्षाच्या पुढाकारातून अधिकाऱ्यांना घेराव घालण्यात आला. मात्र, अशी कारवाई करण्यासंबंधी आम्हाला वरिष्ठ पातळीवरूनच सूचना आहे, किमान चालू बिल भरा, वीज जोडून देतो, असे अधिकारी सांगत आहेत. ग्रामीण भागात हे प्रकार सुरू असताना कर्जत शहरातही नगरपंचायतीच्या पथदिव्यांची वीज याच कारणामुळे तोडण्यात आली. त्यामुळे शहराचा बहुतांश भागही दोन दिवसांपासून अंधारात आहे. ( Power Cut In Ahmednagar Latest News )

वाचा:मुंबईतील अनधिकृत बांधकामांबाबत CM ठाकरे कठोर; दिला ‘हा’ आदेश

विशेष म्हणजे ऊर्जा राज्यमंत्री प्राजक्त तनपुरे यांनी दोन दिवसांपूर्वीच आढावा बैठकीनंतर पत्रकारांशी बोलताना सक्तीने वसुली केली जात नसल्याचे सांगितले होते. असे असूनही राष्ट्रवादीचे आमदार रोहित पवार यांच्या मतदारसंघातच शेतकरी आणि गावांची वीज तोडण्यात आल्याचा प्रकार समोर आला आहे. त्यामुळे भाजपचे माजी मंत्री राम शिंदे यांनी अधिकाऱ्यांना धारेवर धरले. तर भाजपचे प्रवक्ते सचिन पोटरे यांच्या पुढाकारातून शेतकऱ्यांनी आंदोलन करून वीज अधिकाऱ्यांना घेराव घातला. पूर्व सूचना दिल्याशिवाय वीज तोडू नये, अशी मागणी शेतकऱ्यांनी वीज अधिकाऱ्यांकडे केली आहे.

वाचा: राज्य महिला आयोगाच्या अध्यक्षपदी रुपाली चाकणकर; ‘हे’ असेल आव्हान

कर्जत तालुक्यात वीज कंपीनीने ही मोहीम सुरू केली आहे. ज्या ग्रामपंचायतीची पाणी पुरवठा योजना व पथदिव्यांची वीज बिले थकली आहेत, त्यांचा वीज पुरवठा खंडित करण्यात येत आहे. त्यामुळे अनेक गावांत अंधार पसरला असून पाणी योजनाही बंद पडल्या आहेत. बिले भरण्यासाठी मुदतवाढ दयावी, अशी मागणी कर्जत तालुका भाजप शिष्टमंडळाने केली आहे. तालुक्यातील शिंदा व नांदगाव येथील शेतकऱ्यांचीही वीज तोडण्यात आली. संपूर्ण डीपीच बंद करण्यात आल्याने सर्वांचीच अडचण झाली आहे. त्यामुळे ग्रामस्थांनी वीज कंपनीचे कार्यकारी अभियंता कैलास जमदाडे यांना निवेदन दिले. यावेळी भाजप तालुकाध्यक्ष डॉ. सुनील गावडे, जिल्हा प्रसिद्धी प्रमुख सचिन पोटरे, भाजपा किसान आघाडीचे जिल्हा सरचिटणीस सुनील यादव, युवा मोर्चा तालुकाध्यक्ष ज्ञानदेव लष्कर, ओबीसी मोर्चाच्या आशा वाघ, हनुमंत गावडे, आदित्य भोज, सोना भिसे, मोहन घालमे व शिंदा व नांदगाव येथील शेतकरी मोठ्या संख्येने उपस्थित होते. यावेळी माजी मंत्री शिंदे यांनी अधिकाऱ्यांशी दूरध्वनीद्वारे संपर्क साधून वीज पुरवठा पूर्ववत करून बिले भरण्यासाठी मुदत देण्याची मागणी केली.

ग्रामीण भागात ही कारवाई सुरू असताना शहरी भागातही थकबाकीसाठी वीज तोडण्यास सुरवात झाली आहे. कर्जत नगरपंचायतीकडेही वीज बिलाची थकबाकी आहे. त्यामुळे कर्जत शहरातील पथदिव्यांची वीज तोडण्यात आली आहे. त्यामुळे ऐन सणासुदीच्या दिवसांत शहर आंधारात बुडाले आहे. सुदैवाने पाणी पुरवठ्याची वीज अद्याप तरी तोडण्यात आलेली नसल्याने पाणी पुरवठा सुरळीत सुरू आहे.

वाचा: ड्रग्ज पार्टी प्रकरण: आर्यन खानला कोर्टाचा झटका; जामीन अर्ज फेटाळला



Source link

Leave a Reply

Your email address will not be published. Required fields are marked *

%d bloggers like this: