‘कलम ३७० हटवण्याचा निर्णय चूक की बरोबर एवढं शिवसेनेनं सांगावं’


हायलाइट्स:

  • प्रवीण दरेकर यांचं संजय राऊत यांना प्रत्युत्तर
  • केंद्रीय यंत्रणांच्या गैरवापराचे आरोप फेटाळले
  • कलम ३७० वरून शिवसेनेला केला सवाल

मुंबई: जम्मू-काश्मीरच्या मुद्द्यावरून शिवसेना खासदार संजय राऊत यांनी भाजप व केंद्र सरकारवर केलेल्या टीकेला विधान परिषदेतील विरोधी पक्षनेते प्रवीण दरेकर यांनी जोरदार उत्तर दिलं आहे. ‘कलम ३७० हटवण्याचा निर्णय चूक की बरोबर एवढंच संजय राऊत यांनी सांगावं,’ अशी विचारणा दरेकर यांनी आज केली. (Pravin Darekar Give Befitting Reply to Sanjay Raut)

भाजपच्या प्रदेश कार्यालयात घेतलेल्या पत्रकार परिषदेत ते बोलत होते. ३७० कलम हटवूनही जम्मू-काश्मीरमधील परिस्थिती सुधारलेली नाही. तिथं दहशतवादी हल्ले सुरूच आहेत. चीन लडाखमध्ये घुसला आहे. केंद्रीय गृहमंत्र्यांनी यावर खुलासा करायला हवा, असं संजय राऊत आज म्हणाले होते. त्यांच्या या टीकेचा दरेकर यांनी समाचार घेतला. ‘जम्मू काश्मीरमधील ३७० कलम हटविण्याच्या निर्णयाचं शिवसेनेनं सुरुवातीला समर्थन केलं होतं, पण आता शिवसेना उलट भूमिका घेत आहे. यातून शिवसेनेची दुटप्पी भूमिका दिसत आहे. देशाच्या सुरक्षिततेची काळजी घ्यायला गृहमंत्री अमित शहा सक्षम आहेत. चीनचे आक्रमण असो वा काश्मीरची सुरक्षा वा सर्जिकल स्ट्राईक, या सर्व प्रश्नांवर टोकाचे पाऊल उचलण्याची धमक मोदी सरकरमध्ये असल्याचं महाराष्ट्रातील जनतेन पाहिलं आहे. त्यामुळं ती काळजी संजय राऊत यांनी करू नये. त्यांनी महाराष्ट्राच्या सुरक्षा व्यवस्थेकडं पाहावं. आज महाराष्ट्रात अराजकता निर्माण झाली आहे. महिला असुरक्षित आहेत, राज्यात खून, आत्महत्या होत आहेत. राऊत यांनी जम्मू काश्मीरपेक्षा महाराष्ट्रातील अराजकतेवर बोलावं. या विषयी आपल्या महाविकास आघाडी सरकारला सल्ला द्यावा,’ असा टोला दरेकर यांनी हाणला.

ते पुन्हा सांगायला भाग पाडू नका!

‘शिवसेनेच्या मुखपत्रातून अत्यंत खालच्या पातळीवर टीका सुरू आहे. आमचे नेते गांजा घेतात की काय असं बोललं जातं. ड्रग्स, गांजाची बाजू कोण घेतं हे महाराष्ट्रातील जनतेला माहीत आहे. अभिनेता सुशांत सिंह मृत्यू प्रकरणात काय झालं ते पुन्हा पुन्हा सांगायला भाग पाडू नका. तसंच, कोणाचे जावई ड्रग्ज प्रकरणात अटकेत होते हे सुद्धा महाराष्ट्रानं पाहिलंय. कोण ड्रग्ज व अमली पदार्थच्या समर्थनार्थ भूमिका घेऊन त्याला कोण पाठिंबा देतो व कोण अंमली पदार्थाच्या विरोधातील कारवाईच्या बाजूनं उभं राहतो हेही महाराष्ट्र पाहतोय, असं दरेकर म्हणाले. ईडी, सीबीआय, इन्कम टॅक्स आदी सर्व यंत्रणांचा केंद्राकडून गैरवापर होत असल्याचा आरोप बिनबुडाचे आहेत. पुन्हा पुन्हा तीच ढोलकी वाजवून जनतेच्या मनात विनाकारण संभ्रम निर्माण करण्याचा त्यांचा नियोजनबद्ध कार्यक्रम सुरू आहे, असं दरेकर म्हणाले.

हेही वाचा:

‘तुम्ही गुरू माँ असाल किंवा गुरू पिता; बाळासाहेबांच्या मुलाला सर्टिफिकेट देऊ नका’

आर्यन खान प्रकरणामुळं चर्चेत आलेल्या किरण गोसावीच्या सहाय्यकाला अटक



Source link

Leave a Reply

Your email address will not be published. Required fields are marked *