राहुल द्रविड ठरला सर्वात श्रीमंत भारतीय प्रशिक्षक, जाणून घ्या किती करोडो रुपये मिळणार…


नवी दिल्ली : भारताचा माजी महान क्रिकेटपटू राहुल द्रविड आता टीम इंडियासोबत नव्या भूमिकेत दिसणार आहे. भारतीय क्रिकेट संघाचे मुख्य प्रशिक्षक म्हणून द्रविडची नियुक्ती करण्यात आली आहे. आयपीएल २०२१ च्या अंतिम सामन्यासाठी द्रविड बीसीसीआयच्या पाहुण्यांपैकी एक होता आणि यावेळी त्याने प्रशिक्षक होण्यासाठी होकार कळवला. द्रविडचा करार २०२३ पर्यंत असेल. टी-२० विश्वचषक २०२१ नंतर म्हणजेच १४ नोव्हेंबरनंतर तो पदभार स्वीकारेल. द्रविड सध्या राष्ट्रीय क्रिकेट अकादमीचा प्रमुख म्हणून काम पाहात आहे आणि भारतीय संघाचे मुख्य प्रशिक्षकपद स्वीकारण्यापूर्वी तो ते पद सोडेल.

द्रविडला मुख्य प्रशिक्षक पदासाठी १० कोटी रुपयांची ऑफर देण्यात आली आहे. या करारासह सर्वाधिक रक्कम मिळणारा भारतीय संघाचा प्रशिक्षक म्हणून द्रविड ओळखला जाईल. द्रविडचा सहकारी मित्र पारस म्हांब्रे गोलंदाजी प्रशिक्षक म्हणून भारतीय संघाशी जोडले जातील, तर विक्रम राठोड फलंदाजी प्रशिक्षक म्हणून कायम राहणार आहेत. पारसने १९ वर्षांखालील स्तरावर द्रविडसोबत काम केले आहे आणि श्रीलंका दौऱ्यावरही तो द्रविडसोबत होता. २०२० विश्वचषकाच्या अंतिम फेरीत धडक मारणाऱ्या १९ वर्षांखालील भारतीय संघाचा तो मुख्य प्रशिक्षक होता.

टीम इंडिया ४ आयसीसी स्पर्धांमध्ये सहभागी होणार
द्रविड रवी शास्त्रीची जागा घेईल, तर पारस भरत अरुणची जागा घेणार आहे. क्षेत्ररक्षण प्रशिक्षक आर. श्रीधर यांच्याबाबत कोणताही निर्णय घेण्यात आलेला नाही. द्रविडच्या नेतृत्वाखाली टीम इंडिया ४ आयसीसी स्पर्धांमध्ये सहभाग घेणार आहे. पुढील वर्षी टी-२० विश्वचषक आणि २०२३ मधील ५० षटकांचा विश्वचषक आहे. याशिवाय, जागतिक कसोटी अजिंक्यपद स्पर्धेचा अंतिम सामनाही २०२३ मध्ये होणार आहे. बीसीसीआयला आशा आहे की, द्रविडच्या प्रशिक्षणाखाली टीम इंडिया आयसीसी स्पर्धा जिंकण्याचा दुष्काळ संपवेल.

२०१३ पासून सुरू असलेला वर्ल्डकप विजयाचा दुष्काळ द्रविड संपवणार?
टीम इंडियाने २०१३ मध्ये चॅम्पियन्स ट्रॉफी जिंकली. त्यानंतर संघाला आयसीसीची एकही स्पर्धा जिंकता आली नाही. विराट कोहली आणि प्रशिक्षक रवी शास्त्री यांच्या नेतृत्वाखाली भारताने आतापर्यंत २ आयसीसी स्पर्धा गमावल्या आहेत. आयसीसी वर्ल्ड टेस्ट चॅम्पियनशिप २०२१ च्या जेतेपदाच्या सामन्यात न्यूझीलंडने टीम इंडियाचा पराभव केला होता, तर एकदिवसीय विश्वचषक २०१९ च्या उपांत्य फेरीत न्यूझीलंडकडूनही त्यांचा पराभव झाला होता. याशिवाय चॅम्पियन्स ट्रॉफी २०१७ मध्ये विराटच्या नेतृत्वाखालील संघ पाकिस्तानविरुद्धच्या अंतिम सामन्यात पराभूत झाला होता, पण त्यावेळी संघाचे प्रशिक्षक अनिल कुंबळे होते.



Source link

Leave a Reply

Your email address will not be published. Required fields are marked *

%d bloggers like this: