ना फटाक्यांची आतिषबाजी, ना मोठा डामडौल, बीजतुला आणि वृक्षतुला करून लेकीचा वाढदिवस साजरा!


बीड : वाढदिवस म्हटलं की मोठा डामडौल पहावयास मिळतो. कुठे फटाक्यांची आतिषबाजी तर कुठे किलोकिलोचे केक, सेलिब्रेशनच्या हट्टापायी हजारो रुपयांची उधळपट्टी… मात्र याला अपवाद ठरला तो बीडमधला एक वाढदिवस… एका वन्यजीव प्रेमी जोडप्याने आपल्या लेकीचा बीजतुला आणि वृक्षतुला करून अनोखा वाढदिवस साजरा केला.

गळ्यात रानफुलांचा हार घालुन बर्थडे गर्ल सर्पराज्ञी तराजूत बसली होती. वन्यजीव रक्षक सिद्धार्थ आणि सृष्टी सोनवणे यांची एकुलती एक लेक. आपल्या नावाप्रमाणेच निसर्गाचे संवर्धन व्हावे म्हणून 80 प्रजातीच्या अति दुर्मिळ वृक्षांची बीजतुला करून त्यांनी लेकीचा अनोखा पद्धतीने दहावा वाढदिवस साजरा केला आहे.

वन्यजीव प्रेमी सिद्धार्थ आणि सृष्टी सोनवणे यांचे शिरूर तालुक्यातील तागडगाव येथे सर्पराज्ञी नावाचा प्रकल्प आहे. जखमी वन्य जीवांवर इथं उपचार केले जातात, आणि वन्य जीव बरे झाल्यानंतर पुन्हा त्यांना आदिवासात सोडले जाते. याच अनुषंगाने लेकीचा वाढदिवस देखील निसर्ग उपयोगी व्हावा म्हणून या दाम्पत्यानी हा अनोखा उपक्रम हाती घेत लेकीचा वाढदिवस साजरा केला.

या जन्मोत्सवाच्या कार्यक्रमात सर्पराज्ञी सोनवणेची बीजतुला करताना अनेक प्रकारच्या वृक्षबियांचा वापर करण्यात आला. यात सामान्यपणे आढळणार्‍या तसेच दुर्मिळ अति दुर्मिळ सोनसावर, कौशी, वायवर्ण, निर्मली, लाल हादगा, कोशिंब, बिबवा, काटेसावर, पांढरा पांगारा, पिवळा पळस, ताम्हण, तांबडा कुडा, आदीवृक्षांचा बियांचा वापर करण्यात आला.

एरवी वाढदिवस म्हटलं की मोठा डामडौल आणि गाजावाजा करुन पैशाची उधळपट्टी करण्याचे फॅड बीड सगळीकडे आहे. मात्र निसर्गाचे जतनही तितकेच महत्वाचे आहे, असा संदेश देत सोनवणे दाम्पत्यांनी एक नवीन आदर्श समाजापुढे ठेवला आहे.



Source link

Leave a Reply

Your email address will not be published. Required fields are marked *