संविधान आणि देशाच्या रक्षणासाठी सजगपणे काम करेन, मंत्री यशोमती ठाकूर यांचे ‘नव्या वर्षात नवे संकल्प’


जयंत सोनोने, अमरावती : राज्याच्या महिला व बालकल्याण मंत्री यशोमती ठाकूर यांनी मागील दोन वर्षाच्या आपल्या कामाचे अवलोकन करत येत्या नववर्ष म्हणजेच 2022 साठी काही महत्त्वपूर्ण संकल्प केले. स्वतःचं दुःख कुरवाळत बसण्यापेक्षा आपल्यामुळे इतरांची दुःख हलकी होतील असं काम कर. त्या दिवसापासून मी राजकारणात आले, आणि आज राज्याची मंत्री म्हणून काम पाहतेय, असं यशोमती ठाकूर यांनी सांगितलं.

“बघता बघता राज्यमंत्रिमंडळातील माझ्या समावेशाला २ वर्षे झाली. पहिल्यांदाच मंत्री बनण्याचा आनंद आणि उत्साह काही वेगळाच होता, पण हे पद किती काटेरी आहे याची कल्पनाही होती. मी ज्या परिस्थितीतून राजकारणात आले ती परिस्थिती मी कधीच विसरले नाही, आणि म्हणूनच मंत्री झाल्यानंतर माझ्यात फारसा बदल घडला नाही. ज्या व्रतासाठी मी राजकारणात आले, त्या व्रताला या मंत्रीपदामुळे गती आली. माझ्या बाबांनी मला कानमंत्र दिला होता, की स्वतःचं दुःख कुरवाळत बसण्यापेक्षा आपल्यामुळे इतरांची दुःख हलकी होतील असं काम कर. त्या दिवसापासून मी राजकारणात आले, आणि आज राज्याची मंत्री म्हणून काम पाहतेय”, असं यशोमती ठाकूर म्हणाल्या.

“मंत्रीपदाची शपथ घेतल्यानंतर मी कुपोषणमुक्तीसाठी काही मोहीमा सुरू केल्या, महिला सुरक्षेचं ऑडिट हाती घेतलं, बालहक्क या दुर्लक्षित विषय, मात्र या विषयात तज्ज्ञांच्या साह्याने विविध सुधारणा हाती घेतल्या, महिला आयोगाचं सक्षमीकरण हाती घेतलं, महिलांना तक्रार करण्यासाठी मुंबईत यावं लागतं, या सर्वांत मोठ्या प्रश्नावर आजपर्यंत तोडगा काढला गेला नव्हता, मी महिला आयोगाची कार्यालये राज्यभर सुरू करण्याचा निर्णय घेतला आणि अंमलात आणला.”

“मविमच्यामार्फत नवी कर्जवाटप, बचतगटांच्या उत्पादनांचं मार्केटींग, अर्थसाक्षरता असे विविध कार्यक्रम हाती घेतले. अनाथ मुलांचा, परित्यक्ता महिला, वेश्याव्यवसाय करणाऱ्या महिला, भिक्षेकरी महिला-मुलं अशा दुर्लक्षित घटकांसाठी आजवर कोणी केलं नसेल इतके उपक्रम माझ्या कार्यकाळात मी धडाडीने सुरू केले. अचानक आलेल्या कोविडमुळे सगळ्या कामांना ब्रेक लागतो की काय असं वाटायला लागलं. मात्र, आज मागे वळून पाहताना जे लक्षात येतं त्यावर विश्वासच बसत नाही”, अशा भावना त्यांनी व्यक्त केल्या.

“कोविडमुळे जग जरी स्तब्ध झालं असलं तरी जगभरातील महिलांनी या महामारीचा सामना करण्यात फ्रंटलाइन वर्कर म्हणून काम केलं. आरोग्य क्षेत्रात तर महिलांचा सहभाग लक्षणीय आहेच, पण अगदी भाजी विक्री-धान्य विक्री पासून घरोघरी आरोग्य तपासणी, पोषण आहार पोहोचवणे यासारखी सर्व महत्वाची कामं महिलांनी आपल्या खांद्यावर घेतली. कोणी दखल घेवो न घेवो मात्र, माझ्या अंगणवाडी ताई आणि आशा सेविकांमुळे आज अगणित लोकांचे प्राण वाचले आहेत. याच काळात राष्ट्रीय पोषण माह उपक्रमात महाराष्ट्राने देशपातळीवर पहिला क्रमांक पटकावला. कुपोषित बालकांची शोधमोहीम राबवून न जाणो कित्येक मुला-मुलींचे प्राण वाचवले. हे सगळं अभिमानास्पदच आहे”, असंही त्या म्हणाल्या.

पुढे बोलताना त्या म्हणाल्या, “महिला व बालविकास खात्यातील अगदी बारीकसारीक गोष्टींचा या काळात मी आढावा घेतला, अशा वेळी महिला धोरणाची चर्चा जर केली नाही तर मोठी चूक ठरेल. शपथविधीनंतर तात्काळ मी महिला धोरणाचा आढावा घ्यायला सुरूवात केली. महिला धोरण आणणारं पहिलं राज्य असा महाराष्ट्राचा लौकिक आहे. मात्र कालांतराने हे धोरण कागदावरच राहतंय की काय अशी स्थिती निर्माण झाली. जेंडर बजेट साठी आग्रही असल्याने मा. उपमुख्यमंत्री अजित पवार यांनी मांडलेल्या अर्थसंकल्पांमुध्ये जेंडर बजेटला स्थान मिळालं, मात्र ते सुद्धा अपुरं आहे. खऱ्या अर्थाने जेंडर बजेट व्हायचं असेल तर महिला धोरणाची कडक अंमलबजावणी व्हायला पाहिजे, आणि प्रशासकीय उत्तरदायित्व निश्चित करायला पाहिजे. या दृष्टीकोनातून एका समितीचं गठन करून आजच्या काळाला सुसंगत असं महिला धोरण आकारण्यास सुरूवात केली. येत्या महिला दिनापर्यंत हे धोरण तयार झालेले असेल”

सक्षम महिला, सुदृढ बालक, सुपोषित महाराष्ट्र-सुरक्षित महाराष्ट्र ही चतुःसूत्री विभागाचं ब्रीद म्हणून आम्ही अंगीकारलं आहे. विभागाच्या पलिकडे जाऊन राज्यभरात लोकशाहीवर श्रद्धा असलेला समाज निर्माण करणे, जाती-धर्मामध्ये तेढ निर्माण करणाऱ्या तत्वांना रोखणे याबाबत आग्रही राहून काम मला करता आलं याबाबत मला समाधान आहे. देशात निर्माण झालेली परिस्थिती अभूतपूर्व आहे. लोकशाहीचा संकोच होत असल्याचं चित्र आपल्याला सगळीकडे पाहायला मिळतंय. मला अशा काळात स्वस्थ बसणं हा गुन्हा वाटतो, त्यामुळे संविधानाच्या देशाच्या रक्षणासाठी सजगपणे काम करावे लागणार आहे. दोन वर्षाचा हा टप्पा खरं तर फारच छोटा टप्पा आहे, अजून मोठा प्रवास-मोठी लढाई बाकी आहे, अशा भावना त्यांनी व्यक्त केल्या.



Source link

Leave a Reply

Your email address will not be published. Required fields are marked *