वृद्ध व्यक्तीच्या हत्येनंतर खळबळजनक खुलासा; आरोपीला पोलिसांनी २४ तासात केली अटक!


हायलाइट्स:

  • वृद्ध व्यक्तीच्या हत्या प्रकरणातील आरोपीला अटक
  • पोलिसांनी अवघ्या २४ तासात केली अटक
  • आरोपीच्या अटकेनंतर खुनाचं कारण झालं स्पष्ट

गडचिरोली : आरमोरी शहरातील काळागोटा परिसरातील पंचशील वॉर्डात राहणाऱ्या वृद्ध व्यक्तीच्या हत्या प्रकरणातील आरोपीला अटक करण्यात पोलिसांना यश आलं आहे. नितेश प्रभाकर श्रीकुंटवार (वय वर्ष २५, रा. काळागोटा, आरमोरी) असं हत्या करणाऱ्या आरोपीचं नाव आहे.

निमगडे दाम्पत्यावर दिनांक २३ नोव्हेंबर रोजी रात्री अडीच वाजताच्या सुमारास अनोळखी युवकाने प्राणघातक हल्ला करून गौतम निमगडे यांचा खून तर त्याची पत्नी माया निमगडे हिला गंभीर जखमी केलं होतं. हल्ला करून फरार झालेल्या आरोपीस आरमोरी पोलिसांनी अवघ्या २४ तासात अटक केली आहे.

पोलिसांनी दिलेल्या माहितीनुसार, दिनांक २३ नोव्हेंबर रोजी १ ते २ वाजताच्या दरम्यान आरोपी नितेश हा दारू पिऊन निमगडे यांच्या घराजवळ असलेल्या एका घरात चोरी करण्याच्या उद्देशाने आला होता. आरोपी हा बंद असलेल्या घराचं कुलूप दगडाने तोडण्याचा प्रयत्न करत असताना त्याचा आवाज गौतम निमगडे यांना आला आणि त्यांनी आपल्या घराचा दरवाजा उघडून पाहिले असता शेजारच्या घराचं कुलूप कुणीतरी तोडत असल्याचं त्यांना दिसून आले. त्यामुळे त्यांनी आरोपीला हटकले. त्यानंतर आरोपी नितेश हा तिथून पळून गेला.

param bir singh: परमबीर सिंहांची ७ तास कसून चौकशी; बाहेर आले आणि म्हणाले…

आरोपी तेथून पळाल्याने निमगडे दाम्पत्य दरवाजा लावून घरात गेले. मात्र निमघडे यांच्यामुळे आपला चोरी करण्याचा प्रयत्न फसला हा राग आरोपी मनात ठेवून आणि हातात तीक्ष्ण दगड घेऊन अर्ध्या तासात निमघडे यांच्या घरी आला आणि त्यांच्या दरवाजाचा ठोठावला. यावेळी गौतम निमगडे हे आपल्या घरात टेलरिंगचे काम करत होते तर त्यांची पत्नी दुसऱ्या खोलीत झोपी गेली होती.

आरोपीने दरवाजा ठोठावताच निमघडे यांनी दरवाजा उघडला. आरोपी नितेश याने कुठलाही विचार न करता निमगडे यांच्या डोक्यावर दगडाने सपासप वार केले. निमगडे हे ओरडताच त्यांची पत्नी माया झोपेतून जागी होऊन तिने आरोपीस अटकाव करण्याचा प्रयत्न केला असता आरोपीने त्यांच्याही डोक्यावर दगडाने सपासप वार करून तिथून पळ काढला.

या प्राणघातक हल्ल्यात गौतम निमगडे यांचा उपचारादरम्यान मृत्यू झाला तर त्यांची पत्नी ही गंभीर जखमी झाली. या घटनेची तक्रार निमगडे यांच्या मुलांनी पोलीस स्टेशनला दिली असता, घटनास्थळी पोलिसांनी येऊन चौकशी केली. त्यावेळी त्यांना आरोपीचा मोबाईल घटनास्थळी सापडला. पोलिसांनी हा मोबाइल कुणाचा आहे हे शोधून काढले. मात्र आरोपी प्राणघातक हल्ला करून फरार झाला होता. त्याला पकडण्याचं आव्हान आरमोरी पोलिसांसमोर होते. पोलिसांना गोपनीय माहिती मिळाली की, आरोपी हा ब्रम्हपुरी तालुक्यातील बरडकिनी या गावात बहीण आणि जावयाकडे आहे. पोलिसांनी वेळ न दवडता सदर गाव गाठून आरोपीला दिनांक २४ नोव्हेंबर रोजी सायंकाळी अटक केली.

दरम्यान, आरोपी नितेश श्रीकुंटवार हा विकृत व गुन्हेगारी प्रवृत्तीचा असून यापूर्वी त्याच्यावर ३७६ कलमानुसार आरमोरी पोलीस स्टेशनला बलात्काराचा गुन्हा दाखल आहे. दिनांक ९ नोव्हेंबर रोजी तो चंद्रपूर कारागृहातून बलात्काराच्या केसमधून जामिनावर सुटून आरमोरीला आला आणि १५ दिवसातच त्याने निमगडे दाम्पत्यावर प्राणघातक हल्ला करून खून केला. आरमोरी पोलिसांनी आरोपी नितेश श्रीकुंटवार याच्यावर भांदवी ३०२, ३०७, ४५० कलमाद्वारे गुन्हा दाखल केला असून गुरुवारी त्याला प्रथम सत्र न्यायदंडाधिकारी यांच्यासमोर उभे केले असता त्याला सात दिवसाची पोलीस कोठडी देण्यात आली आहे. अधिक तपास आरमोरीचे ठाणेदार मनोज काळबांडे करत आहेत.



Source link

Share on facebook
Share on twitter
Share on linkedin
Share on whatsapp
Share on telegram
%d bloggers like this: