नवाब मलिक यांची भाजपला हात जोडून विनंती; म्हणाले…


हायलाइट्स:

  • नवाब मलिक यांची मुंबईत पत्रकार परिषद
  • ‘एनसीबी’मधील चांडाळचौकडीवर साधला निशाणा
  • भाजप नेत्यांना केली हात जोडून विनंती

मुंबई: ‘नार्कोटिक्स कंट्रोल ब्यूरो (NCB) च्या आडून काही मोजके अधिकारी शहरात वसुलीच्या कारवाया करतात. एनसीबीच्या मुंबई विभागीय कार्यालयात ही चांडाळचौकडी आहे. ही चौकडीच बोगस कारवाया करून एनसीबीला बदनाम करते आहे,’ असा आरोप राष्ट्रवादी काँग्रेसचे प्रवक्ते नवाब मलिक (NCB) यांनी आज केला. या चौकडीत सामील असलेल्या अधिकाऱ्यांची नावंही त्यांनी जाहीर केली.

मुंबईत घेतलेल्या पत्रकार परिषदेत ते बोलत होते. ‘अमली पदार्थांचा व्यापार व वापर थांबावा यासाठी मी सातत्यानं पाठपुरावा करतोय. अनेक अधिकाऱ्यांना भेटलो आहे. ‘एमडी’चा ड्रगमध्ये समावेश व्हावा यासाठीही मी प्रयत्न केले होते. आमची लढाई कुठल्या पक्षाविरुद्ध नाही. ही केंद्र सरकार विरुद्ध राज्य सरकारची लढाई नाही. आम्ही कुठल्याही नेत्यावर आरोप करत नाही. एनसीबीमध्ये एक चांडाळचौकडी आहे. त्या चौकडीच्या नसत्या उद्योगांविरोधात आमची लढाई आहे. त्यांना आम्ही उघडं करत आहोत,’ असं मलिक म्हणाले.

वाचा: ‘ठाकरे सरकारमधील ‘या’ मंत्र्यालाही होतं क्रूझवरील ड्रग्ज पार्टीचं आमंत्रण’

समीर वानखेडे, व्ही व्ही सिंग, आशिष रंजन व अनिल माने ही ‘एनसीबी’मधील चांडाळचौकडी आहे. ‘एनसीबी’नं हे घाणेरडे मासे बाहेर फेकून द्यायला हवेत. हीच चौकडी संपूर्ण यंत्रणेची बदनामी करतेय. ही बदनामी थांबवायची असेल तर एनसीबीच्या वरिष्ठ अधिकाऱ्यांनी या चौकडीची चौकशी करावी. कोणालाही चुकीच्या पद्धतीनं अडकवू नका, पण ही चौकशी शेवटपर्यंत न्या,’ असं आवाहन मलिक यांनी केलं. ‘ड्रग्जचं उच्चाटन झालंच पाहिजे, साफसफाई झालीच पाहिजे, पण ही चांडाळचौकडी एनसीबीमध्ये असेपर्यंत ड्रग बंद होणार नाही,’ असंही मलिक म्हणाले.

भाजपच्या नेत्यांना हात जोडतो…

नवाब मलिक यांनी यावेळी भाजपच्या नेत्यांनाही आवाहन केलं. ‘मी एनसीबी किंवा भाजपच्या विरोधात लढत नाही. मी चुकीच्या लोकांविरुद्ध लढतोय. निष्पाप लोकांच्या फसवणुकीच्या विरोधात लढतोय. त्यामुळं फ्रॉड लोकांची पाठराखण करू नका. सुनील पाटील, मोहित कंबोज, मनीष भानुशाली, धवल भानुशाली अशा लोकांना वाचवू नका. राजकीय पक्षाच्या नावाखाली हे लोक चुकीचे धंदे करत आहेत. समीर वानखेडे हा एक भ्रष्ट माणूस आहे. त्यांनी मुंबईला ‘पाताळ लोक’ बनवून ठेवलंय. भाजपनं त्यांची पाठराखण करू नये,’ अशी विनंती मलिक यांनी केली.

वाचा: राजीव बजाज नावाचा बोगस पत्रकार समीर वानखेडेंसाठी काम करतो – नवाब मलिक



Source link

Share on facebook
Share on twitter
Share on linkedin
Share on whatsapp
Share on telegram
%d bloggers like this: