आर्यनच्या जामीनासाठी वकिलांची फौज; आता ‘हे’ नवे वकील लढणार केस


हायलाइट्स:

  • आर्यन खानच्या जामीन अर्जावर आज सुनावणी
  • हायकोर्टात दुपारच्या सत्रात सुनावणीची शक्यता
  • आर्यनच्या जामीनासाठी शाहरुखने उभी केली वकिलांची फौज

मुंबईः कोर्डेलिया क्रुझ ड्रग्ज पार्टी (Drugs on cruise ship case) प्रकरणी ३ ऑक्टोबरपासून अटकेत असणाऱ्या आर्यन खानच्या (Aryan Khan) जामीन अर्जावर आज सुनावणी आहे. आर्यन खानच्यावतीने आज मुंबई उच्च न्यायालयात सर्वोच्च न्यायालयातील ज्येष्ठ वकील मुकुल रोहतगी (Mukul Rohatgi) हे युक्तीवाद करणार आहेत.

२० ऑक्टोबर रोजी एनडीपीएस कायद्याच्या अतंर्गंत विशेष न्यायालयाने जामीन नाकारत आर्यनच्या कोठडीत ३० ऑक्टोबरपर्यंत वाढ केली होती. त्यानंतर आर्यन खानने तातडीच्या सुनावणीसाठी मुंबई उच्च न्यायालयात धाव घेतली होती. त्याप्रकरणी आज मुंबई उच्च न्यायालयात आर्यन खानसह अरबाज मर्चंट व मुनमुन धमेचा यांच्याही जामीन अर्जावर सुनावणी पार पडणार आहे.

फरार किरण गोसावीला अटक होणार?; पुणे पोलिसांचे पथक लखनऊला रवाना

आर्यन खानला जामीन मिळवून देण्यासाठी सुप्रीम कोर्टातील ज्येष्ठ वकील मुकुल रोहतगी हे आज हायकोर्टात युक्तीवाद करणार आहेत. मुकुल रोहतगी आणि त्यांची टीम लंडनहून मुंबईत दाखल झाली आहे. तसंच, या टीमला आर्यनची बाजू मांडणारी टीम कायदेशीर सहकार्य करणार असल्याची माहिती आहे. शिवाय, ज्येष्ठ वकील अमित देसाई आणि सतीश मानेशिंदे हेदेखील सुनावणीला उपस्थित राहणार आहेत.

कोर्डिलिया अमलीपदार्थ प्रकरणात २ ऑक्टोबरला इंटरनॅशनल क्रूझ टर्मिनलवरून एनसीबीने आर्यनला ताब्यात घेतल्यानंतर ३ ऑक्टोबर रोजी त्याला अटक करण्यात आली होती. मॅजिस्ट्रेट कोर्टाने त्याला आधी एनसीबी कोठडी आणि नंतर न्यायालयीन कोठडी सुनावण्यात आली होती. न्यायालयीन कोठडी सुनावताच आर्यनतर्फे ज्येष्ठ वकील सतीश मानेशिंदें यांनी जामिनासाठी अर्ज सादर केला. मात्र, आर्यनविरोधात लावलेली कलमे पाहता या कोर्टाला जामीन अर्जावर सुनावणी घेण्याचा अधिकार नाही, असा आक्षेप एनसीबीतर्फे अतिरिक्त सॉलिसिटर जनरल अनिल सिंग यांनी नोंदवल्यानंतर त्या कोर्टाने त्या तांत्रिक मुद्द्यावर अर्ज फेटाळला. त्यानंतर आर्यनतर्फे सेशन्स कोर्टातील विशेष एनडीपीएस कोर्टासमोर अर्ज करण्यात आला. त्यात आर्यनतर्फे मुंबईतील सुप्रसिद्ध ज्येष्ठ फौजदारी वकील अमित देसाई यांनी युक्तिवाद मांडला. मात्र, तो अर्ज विशेष न्यायाधीश वैभव पाटील यांनी सुनावणीअंती २० ऑक्टोबरला फेटाळला. त्याचदिवशी सतीश मानेशिंदे यांनी आर्यनतर्फे मुंबई हायकोर्टात जामीन अर्ज दाखल केला. मात्र, न्या. नितीन सांब्रे यांनी २६ ऑक्टोबरला (आज) सुनावणी घेऊ, असे सांगितले.

लवकरच ‘स्पेशल २६’ रिलीज करतोय; मलिक कोणता गौप्यस्फोट करणार?

आता हायकोर्टात आर्यनसाठी देशातील सर्वाधिक आघाडीच्या वकिलांपैकी एक असलेले निष्णात वकील मुकुल रोहतगी हे युक्तिवाद मांडणार आहेत. मागील २३ दिवसांपासून गजाआड असलेल्या आपल्या मुलाला जामिनावर बाहेर आणण्यासाठी सुप्रसिद्ध अभिनेता शाहरुख खानचा सर्व आटापिटा सुरू आहे. म्हणूनच आर्यनच्या बचावासाठी वकिलांची मोठी फौज सध्या जुंपली आहे.

एनडीपीएस कोर्टाने मुख्यत्वे आर्यनच्या व्हॉट्सअॅप चॅटिंगच्या आधारावर त्याला जामीन नाकारला. त्यातील संभाषणातून आर्यनचे अमलीपदार्थांच्या तस्करी व व्यापार करणाऱ्या लोकांशी खूप पूर्वीपासून संबंध असल्याचे आणि तो कटातील एक भाग असल्याचे दिसते, असे कारण त्या कोर्टाने आपल्या निर्णयात दिले. आता एनडीपीएस कोर्टाचा तो निष्कर्ष आर्यनची वकिलांची टीम कशी चुकीचा ठरवते, हा उत्सुकतेचा विषय आहे. त्याचबरोबर मागील दोन-तीन दिवसांत या प्रकरणात घडलेल्या नाट्यमय घडामोडींचा आर्यनच्या जामिनासाठी कसा उपयोग किंवा दुरुपयोग होतो, हे पाहणं औत्सुक्याचे ठरणार आहे.



Source link

Share on facebook
Share on twitter
Share on linkedin
Share on whatsapp
Share on telegram
%d bloggers like this: