मुंबईकरांचा लोकल प्रवास होणार अधिक सोपा; बोरिवलीहून थेट सीएसएमटी पोहोचता येणार


म. टा. विशेष

– नव्या वर्षात हार्बर विस्ताराचे प्रत्यक्ष काम सुरू होणार

मुंबई : पश्चिम रेल्वेच्या बोरीवली स्थानकातून मध्य रेल्वेवरील छत्रपती शिवाजी महाराज टर्मिनस येथे पोहोचता येणार आहे. हार्बर मार्गाच्या विस्तारीकरणाचे काम नव्या वर्षाच्या मुहूर्तावर सुरू करण्यात येणार आहे. (Mumbai Local News Update)

सध्या बोरिवलीहून सीएसएमटी येथे पोहोचण्यासाठी माहीम किंवा दादरला उतरावे लागते. गोरेगाव-माहिमवरून हार्बरमार्गे आणि दादरवरून मध्य रेल्वे मार्गे सीएसएमटीला पोहोचता येते. एका फलाटावर अन्य फलाटावर जाणे, पूल चढणे-उतरणे, स्वतंत्र तिकीट काढणे असे दिव्य यासाठी नागरिकांना पार करावे लागते. सकाळ-सायंकाळ गर्दीच्या वेळेत हे अधिक जिकिरीचे होते. यामुळे मुंबईकरांच्या दृष्टीने हा अत्यंत महत्त्वाचा रेल्वे प्रकल्प आहे. या प्रकल्पात

जागेची अडचण असल्याने मालाड स्थानक उन्नत बनवण्याचा निर्णय घेण्यात आला असून गोरेगाव ते कांदिवलीदरम्यान सुमारे तीन किमीचा मार्गही उन्नत असेल. उर्वरित मार्ग जमिनीला समांतर असणार आहे.

गोरेगाव ते बोरिवलीदरम्यान हार्बर मार्गावर रुळ उभारण्यासाठी पूर्व तयारी म्हणून ‘अलायनमेंट सर्वेक्षण’ सुरू आहे. ड्रोन तसेच आधुनिक तंत्रज्ञानाच्या मदतीने हे सर्वेक्षण पूर्ण करण्यात येईल. प्रकल्पासाठी निविदेतून १८ पैकी १३ सल्लागारांची नियुक्ती करण्यात आली आहे. प्रकल्पातील जमीन, झाडे, जमिनीखाली १.५ मीटर खोल वापरात असलेल्या विविध पाइपलाइन यांचे सर्वेक्षण करण्याचे काम सध्या सुरू आहे, असे वरिष्ठ रेल्वे अधिकाऱ्यांनी सांगितले.

सद्यस्थितीत असलेल्या रेल्वे रुळांच्या शेजारी नवे रूळ टाकण्यासाठी जागेची प्रचंड अडचण आहे. सर्वक्षणाअंती कोणत्या स्थानकादरम्यान किती जागेची आवश्यकता आहे, उन्नत मार्गासाठी जागेची गरज याची तपशीलवार माहिती मिळेल, त्यानुसार निविदा मागवून कामे सुरू करण्याचे नियोजन असल्याचे पश्चिम रेल्वेने स्पष्ट केले.

‘अलायनमेंट सर्वेक्षणा’चे काम डिसेंबरमध्ये पूर्ण होऊन त्याचा अहवाल पश्चिम रेल्वेकडे सादर होईल. त्यानुसार निविदा मागवून नव्या वर्षात म्हणजेच जानेवारी २०२२ पासून प्रकल्पाचे प्रत्यक्ष काम सुरू होणार आहे.

– सुमीत ठाकूर, मुख्य जनसंपर्क अधिकारी, पश्चिम रेल्वे

विस्तारीकरणाचा प्रवास

मुंबई रेल्वे विकास महामंडळ (एमआरव्हीसी) मुंबई शहरी परिवहन प्रकल्प (एमयूटीपी) ३ अ मध्ये गोरेगाव ते बोरिवली (७.८ किमी) असा हार्बर विस्तारीकरणाचा प्रकल्प मांडण्यात आला. एप्रिल २०१९ मध्ये रेल्वे मंडळाने याला मंजुरी दिली. गोरेगाव ते हार्बर विस्तारीकरण प्रकल्पाचा अपेक्षित खर्च ७४५.३१ कोटी इतका आहे. याचबरोबर मध्य आणि पश्चिम रेल्वेसाठी स्टेबलिंग मार्गही उभारण्यात येणार असून याचा खर्च ४८५ कोटी इतका आहे.



Source link

Share on facebook
Share on twitter
Share on linkedin
Share on whatsapp
Share on telegram
%d bloggers like this: