IPL 2021 : अखेर ‘मिस्ट्री गर्ल’ हसली; नेटकऱ्यांनी मानले हैदराबादच्या संघाचे आभार


IPL 2021 : दुबई : बऱ्याच सामन्यानंतर इंडियन प्रीमियर लीग (आयपीएल) २०२१ मध्ये सनरायझर्स हैदराबाद (SRH) च्या संघाने राजस्थान रॉयल्स (RR)विरूद्ध विजय मिळवत त्यांच्या चाहत्यांना आनंद साजरा करण्याची संधी दिली. हैदराबादच्या या विजयानंतर सोशल मीडियात सध्या चर्चा सुरू आहे ती सनरायझर्स हैदराबादच्या प्रसिद्ध ‘मिस्ट्री गर्ल’ची. सनरायझर्सची ही ‘मिस्ट्री गर्ल’ दुसरी तिसरी कुणी नसून संघाची मालक कलानिधी मारन यांची मुलगी काव्या मारन ही आहे. सनरायझर्स हैदराबादचा सामना असल्यास काव्या अनेकदा स्टेडियममध्ये हजेरी लावते. चांगल्या आणि वाईट काळातही ती टीमला चीअर करताना दिसते. विजयानंतर आणि पराभवानंतरची प्रतिक्रिया काव्याच्या चेहऱ्यावरून दिसत असल्याने आयपीएल आणि सनरायझर्सच्या चाहत्यांसाठी ती ‘मिस्ट्री गर्ल’ आहे. क्षणार्धात तिचे फोटो सोशल मीडियावर व्हायरल होऊ लागतात.

नुकताच दुबईच्या शेख झायेद आंतरराष्ट्रीय स्टेडियमवर राजस्थान रॉयल्स आणि सनरायझर्स हैदराबाद यांच्यात सामना रंगला. या सामन्यात हैदराबादने राजस्थानचा सात गडी राखून पराभव केला. १६५ धावांचा पाठलाग करताना हैदराबादने ९ चेंडू शिल्लक राखत सामना जिंकला. आयपीएल २०२१ मधील सनरायझर्सचा हा फक्त दुसराच विजय होता. हैदराबाद गुणतालिकेत तळाशी आहे. या सामन्यातील विजयानंतर काव्याचे अनेक फोटो सोशल मीडियावर व्हायरल झाले आहेत. तिच्या चाहत्यांनी हे फोटो वेगवेगळ्या कॅप्शनसह शेअर केले आहेत. काव्याचा फोटो शेअर करताना एका चाहत्याने लिहिलं आहे की, “बऱ्याच दिवसांनी शेवटी काव्या मारन हसताना दिसली. सामना जिंकल्याबद्दल सनरायझर्स हैदराबादचे आभार.”

काव्या तिच्या संघाची भक्कम समर्थक आहे. तिने भारतात आणि परदेशातही आयपीएल सामन्यांदरम्यान आपल्या स्टेडियममधील उपस्थितीने अनेकांचे लक्ष वेधून घेतले आहे. २९ वर्षीय काव्या सनरायझर्स हैदराबाद फ्रेंचाइजीची सह-मालक आहे. सन टीव्हीच्या मालकीची सन म्युझिक आणि एफएम चॅनेलशी ती संबंधित आहे. सोशल मीडियावर मात्र काव्याची जोरदार चर्चा असल्याचे पाहायला मिळाले आहे. त्यामुळे आता पुढच्या सामन्यात सर्वांचे लक्ष काव्यावरच असणार आहे.



Source link

Share on facebook
Share on twitter
Share on linkedin
Share on whatsapp
Share on telegram
%d bloggers like this: