पालघरमध्ये अतिवृष्टी; धामणी धरणाचे सर्व दरवाजे उघडले, सूर्या नदीला पूर


हायलाइट्स:

  • पालघर जिल्ह्याला मुसळधार पावसाने झोडपले
  • धामणी धरणाचे सर्व दरवाजे उघडले
  • सूर्या नदीला पूर. हजारो क्युसेक पाण्याचा विसर्ग

नरेंद्र पाटील । मटा वृत्तसेवा

पालघर जिल्ह्यातील सिंचन व पिण्याच्या पाण्यासाठी बांधण्यात आलेल्या सूर्या प्रकल्पाच्या धामणी धरण क्षेत्रात मागील काही तासांत तब्बल ५३ मिमी पावसाची नोंद झाली असून त्यामुळं धामणी धरण १०० टक्के भरलं आहे. धरणाचे सर्व दरवाजे पूर्णपणे उघडण्यात आले असून त्यातून तब्बल १९.२०५ क्युसेक वेगाने पाण्याचा विसर्ग होत आहे.

धामणी धरणाची आजची पाण्याची पातळी ११८.६५ मीटर आहे तर, धरणातील सध्याचा पाण्याचा साठा २७६.३५ दशलक्ष घन मीटर आहे. या धरणाच्या क्षेत्रात सोमवारी ५३ मिमी पावसाची नोंद झाली असून धरण १०० टक्के भरले आहे. मुसळधार पावसामुळे पाण्याची पातळी वाढली असल्याने धरणाचा दरवाजा क्रमांक २ आणि ४ उघडण्याची गरज निर्माण झाली. त्यानुसार सोमवारी सकाळी ९ वाजता प्रत्येकी ३५ सेमीने पाण्याचा विसर्ग वाढवण्यासाठी धरणाचे दरवाजे उघडण्यात आले. मात्र, अतिवृष्टी सुरूच राहिल्याने सकाळी ११ वाजता उघडण्यात येणारे सर्व पाचही दरवाजे १० वाजताच ४१ सेंटीमीटरने उघडण्यात आले आहेत. त्यातून १५ हजार २०० क्यूसेक वेगाने विसर्ग सुरू झाला होता. त्यानंतरही पाऊस सुरूच राहिल्याने दुपारी अडीच वाजता या धरणाचे सर्व दरवाजे १०० टक्के पूर्ण उघडण्यात आले आहेत. तर प्रकल्पाच्या सांडव्यातून वीज निर्मिती करण्यात येणाऱ्या ठिकाणच्या विसर्गातून ६४९ क्यूसेक वेगाने पाणी बाहेर पडत आहे.

कवडास धरणाच्या पाण्याची पातळी ६६.७० मीटर असून धरणातील सध्याचा पाणीसाठा ९.९६ दशलक्ष घनफूट मीटर आहे. हे धरण १०० टक्के भरले आहे. या धरणातून ८१५. १२८ क्यूमेक्स म्हणजेच २८ हजार ७८२ क्यूसेक पाण्याचा विसर्ग होत आहे. त्यामुळे सूर्या नदीत आताच्या घडीला एकूण ४० हजार १३४ क्यूसेक वेगाने पाण्याचा विसर्ग होत असून नदीला पूर आला आहे.

हेही वाचा:

हसन मुश्रीफांनी शेकडो कोटींचा घोटाळा केला; सोमय्यांचा आरोप

आरोप खोटे, सोमय्यांवर १०० कोटींचा अब्रुनुकसानीचा दावा करणार: मुश्रीफ



Source link

Share on facebook
Share on twitter
Share on linkedin
Share on whatsapp
Share on telegram
%d bloggers like this: