सॉफ्टवेअर इंजिनिअर ते IAS ऑफिसर, आता पॅरालिम्पिकमध्ये रौप्यपदक; ‘कलेक्टर’ साहेबांचा रंजक प्रवास


नवी दिल्ली : भारतातील आयएएस अधिकाऱ्यांवर देशातील लोकांच्या सेवा आणि सुरक्षेची महत्वाची जबाबदार असते. देशातील सर्वात हुशार आयएएस अधिकाऱ्यांमध्ये गणले जाणारे सुहास एलवाय हे त्यांच्या कामातील प्रामाणिकपणा आणि मेहनतीसाठी ओळखले जातात. आज त्यांनी त्यापलीकडे जात आपली नवी ओळख निर्माण केली आहे. टोकियो पॅरालिम्पिक स्पर्धेत रौप्य पदक जिंकत त्यांनी नवा इतिहास रचला आहे. सॉफ्टवेअर इंजिनिअरपासून आयएएस अधिकारी आणि रौप्य पदक विजेता पॅरा शटरलपर्यंतचा त्यांचा प्रवास थक्क करणारा आहे.लहानपणापासूनच दिव्यांग असलेल्या सुहास यांनी आपल्या आयुष्यात कोणत्याही क्षणी आपल्या शरीरातील कमकुवतपणाला आपल्या यशात अडचण बनवलं नाही. उजव्या पायाने दिव्यांग असूनही सुहास बॅडमिंटन कोर्टवर जेव्हा उतरतात तेव्हा भल्या-भल्या खेळाडूंचा घाम काढतात. टोकियो पॅरालिम्पिकमध्ये त्यांनी हेच साध्य केलं.

वडिलांनी दिला आत्मविश्वास
कर्नाटकातील ३८ वर्षीय सुहासच्या गुडघ्यांमध्ये विकार आहे. सुहास यांनी डॉक्टर व्हावे, अशी त्यांच्या आई-वडिलांची इच्छा होती, पण त्यांनी इंजिनीअरिंग निवडले. २००५ मध्ये वडिलांच्या मृत्यूनंतर सुहासचा आधार गेला. त्यांनी एकदा सांगितलं होतं की, त्यांच्या जीवनात वडिलांचे महत्त्वाचे स्थान आहे. त्यांचे जाणे सुहाससाठी मोठा धक्का होता. दरम्यान, नागरी सेवेत रुजू होण्याचा त्यांनी निश्चय केला आणि तयारी सुरू केली. २००७ मध्ये ते आयएसएस अधिकारी झाले. गेल्या वर्षी कोरोना महामारीदरम्यान त्यांना नोएडाचे डीएम बनवण्यात आले होते.

सुहास यांनी एका मुलाखतीत सांगितले होते की, एका स्पर्धेच्या उद्घाटनासाठी त्यांना पाहुणे म्हणून आमंत्रित करण्यात आले होते. तेथे त्यांनी खेळाडूंसोबत खेळण्याची इच्छा व्यक्त केली. त्यावेळी त्यांनी राज्यस्तरीय खेळाडूंना पराभूत केले. त्या ठिकाणी उपस्थित असलेल्या देशाच्या पॅरा-बॅडमिंटन संघाचे विद्यमान प्रशिक्षक गौरव खन्ना यांनी त्यांना पाहिले आणि त्यांना व्यावसायिक बॅडमिंटन स्पर्धांमध्ये खेळण्याचा सल्ला दिला. त्याच वर्षी सुहास यांनी बीजिंग येथे झालेल्या आशियाई चॅम्पियनशिपमध्ये भाग घेतला आणि सुवर्णपदक जिंकणारे पहिले बिगरमानांकित खेळाडू ठरले.

हनुमानाची मूर्ती ठेवतात सोबत
ऑगस्टच्या शेवटच्या आठवड्यात टोकियोला जाण्यापूर्वी, जेव्हा सुहास यांना त्यांच्या बॅडमिंटन सराव आणि डीएम म्हणून काम करण्याबद्दल विचारण्यात आले, तेव्हा त्यांनी पत्रकारांना सांगितले की, “दिवसभराचे काम संपल्यानंतर मी रात्री १० वाजल्यानंतर दोन तास सराव करतो. जवळजवळ सहा वर्षांपासून मी माझा बॅडमिंटन सराव आणि प्रशासकीय कर्तव्ये सांभाळत आहे. सुहास यांचा देवावर खूप विश्वास आहे. जेव्हा ते स्पर्धेत सामना खेळण्यासाठी जातात, तेव्हा कोर्टवर उतरण्यापूर्वी भगवान हनुमानाच्या मूर्तीचं दर्शन करतात. ते म्हणाले की, देवाची मूर्तीमुळे त्यांना शक्ती आणि आत्मविश्वास मिळतो.



Source link

Share on facebook
Share on twitter
Share on linkedin
Share on whatsapp
Share on telegram
%d bloggers like this: