इंग्लंडच्या क्रिकेटपटूच्या घरी पाळणा हलला; छोट्या परीचा फोटो झाला व्हायरल…


INDvsENG : लंडन : इंग्लंडचा युवा यष्टीरक्षक फलंदाज जोस बटलर दुसऱ्यांदा वडील झाला आहे. त्याच्या पत्नीने रविवारी (५ सप्टेंबर) मुलीला जन्म दिला. २०१९मध्ये पहिल्यांदा ते पालक झाले होते. याआधी त्या दोघांना एक मुलगी झाली होती, तिचं नाव जॉर्जिया रोज असं आहे. पत्नी आणि लहान बाळासोबत वेळ घालविता यावा यासाठी बटलरने भारताविरुद्ध खेळल्या जाणाऱ्या कसोटी मालिकेतील चौथ्या आणि पाचव्या कसोटी सामन्यातून माघार घेण्याचा निर्णय घेतला होता. तसेच त्याने आयपीएल-१४च्या उर्वरित हंगामातूनही माघार घेतली आहे. बटलर आयपीएलमध्ये राजस्थान रॉयल्स या संघातून खेळतो.

बटलरला मुलगी झाल्यानंतर त्याच्या आयपीएल संघाने काही फोटोही त्यांच्या सोशल मीडिया पेजवरून पोस्ट केले आहेत. बटलरने आपल्या या लहान परीचं नाव मॅगी ठेवलं आहे. फोटो पोस्ट करताना फ्रँचायझीने लिहिलं आहे की, “जोसला एक मुलगी झाली आहे. रॉयल्स कुटुंबात मॅगीचे स्वागत आहे.”

टी-२० विश्वचषकात करणार पुनरागमन
भारताविरुद्ध दोन कसोटी सामन्यांनंतर उर्वरीत आयपीएलमधूनही बाहेर पडल्यानंतर बटलर संयुक्त अरब अमिराती आणि ओमानमध्ये खेळल्या जाणाऱ्या टी-२० विश्वचषकात पुनरागमन करणार आहे. भारताविरुद्ध खेळल्या जाणाऱ्या पाच सामन्यांच्या कसोटी मालिकेतील तो पहिल्या तीन सामन्यांमध्ये खेळला, पण फारसा यशस्वी झाला नाही, त्यामुळे ब्रेकनंतर तो टी-२० विश्वचषकात कसे पुनरागमन करतो, हे पाहणे मनोरंजक ठरेल. आयपीएलचा १४ वा हंगाम भारतात आयोजित केला जात होता, पण कोलकाता नाईट रायडर्स आणि चेन्नई सुपर किंग्जच्या गोटामधून कोविड-१९ पॉझिटिव्ह प्रकरणांची नोंद झाली. आणि त्यानंतर मेच्या पहिल्या आठवड्यात स्पर्धा स्थगित करण्यात आली. आता ही लीग यूएईमध्ये १९ सप्टेंबरपासून सुरू होत आहे. बटलरने हंगामाच्या पहिल्या टप्प्यात राजस्थानकडून सात सामने खेळले. यामध्ये त्याने एका शतकासह एकूण २५४ धावा केल्या. त्याचबरोबर बटलरने भारताविरुद्ध खेळलेल्या तीन कसोटी सामन्यांमध्ये ०, १७, २३, २५, ७ धावा केल्या आहेत.

ही आहे मालिकेची स्थिती
भारत आणि इंग्लंड यांच्यात खेळल्या जाणाऱ्या पाच सामन्यांच्या मालिकेतील पहिला सामना अनिर्णित राहिला. भारताने लॉर्ड्स मैदानावर खेळलेला दुसरा कसोटी सामना जिंकून मालिकेत आघाडी घेतली. यानंतर इंग्लंडने दमदार पुनरागमन केले, तिसऱ्या सामन्यात भारताला एक डाव आणि ७६ धावांनी पराभूत करून मालिकेत १-१ अशी बरोबरी साधली. सध्या मालिकेचा चौथा सामना ओव्हल मैदानावर खेळला जात आहे. चौथ्या दिवसाचा खेळ सुरू आहे.



Source link

Share on facebook
Share on twitter
Share on linkedin
Share on whatsapp
Share on telegram
%d bloggers like this: