IND v AFG : रोहित शर्मा आणि लोकेश राहुल यांची दिवाळीपूर्वीच फटाकेबाजी, भारताने उभारला धावांचा डोंगर…


आबुधाबी : करो या मरो सारख्या सामन्यात कशी फलंदाजी करायची, याचा उत्तम वस्तुपाठ रोहित शर्मा आणि लोकेश राहुल या भारताच्या सलामीवीरांनी दाखवून दिला. दिवाळीपूर्वीच भारताच्या या दोन्ही सलामीवीरांनी मैदानात धावांची फटेकाबाजी केली आणि त्यामुळेच भारताला मोठी धावसंख्या उभारता आली. रोहित शर्माने यावेळी ७४ धावांची दणदणीत खेळी साकारली, तर राहुलने ६९ धावा करत त्याला चांगली साथ दिली. रोहित-राहुलनंतर हार्दिक पंड्या आणि रिषभ पंत यांनी आक्रमक फलंदाजी केल्यामुळे भारताला अफगाणिस्तानपुढे २११ धावांचे आव्हान ठेवता आले…

अफगाणिस्तानने या महत्वाच्या सामन्यात नाणेफेक जिंकली आणि प्रथम गोलंदाजी करण्याचा निर्णय घेतला. गेल्या दोन्ही सामन्यांमध्ये भारताची प्रथम फलंदाजीच आली होती आणि संघाचा डाव गडगडल्याचे पाहायला मिळाले होते. पण या सामन्यात मात्र कसे घडले नाही. रोहित शर्मा आणि लोकेश राहुल यांनी सुरुवातीपासूनच अफगाणिस्तानच्या गोलंदाजीवर प्रहार करायला सुरुवात केली. या दोघांनी पहिल्या पॉवर प्लेमध्येच संघाचे अर्धशतक झळकावले होते. अर्धशतक पूर्ण केल्यावरही रोहित आणि राहुल यांनी फटकेबाजी सुरुच ठेवली. रोहित शर्माने यावेळी चौकारासह आपले अर्धशतक पूर्ण केले आणि सलामीला आपणच कसे योग्य आहोत, हे सर्वांना दाखवून दिले. रोहित पाठोपाछ राहुलनेही चौकारासह आपले अर्धशतक साजरे केले. आतापर्यंतच्या विश्वचषकातील तिन्ही सामन्यांमध्ये भारताची ही सर्वाधिक धावांची सलामी ठरली आहे.

रोहित आणि राहुल यांनी अर्धशतक झळकावल्यावर सुसाट फलंदाजी केली. अफगाणिस्तानची गोलंदाजी ही चांगली मानली जात होती. पण रोहित आणि राहुल या दोघांनी अफगाणिस्तानच्या गोलंदाजांना यावेळी आपल्यापुढे लोटांगण घालण्यास भाग पाडले. अफगाणिस्तानच्या गोलंदाजीतील हुकमी एक्का रशिद खान समजला जातो, पण रशिद खानच्या १४व्या षटकात रोहितने सलग दोन षटकार लगावले. पण त्यानंतरच्या १५ व्या षटकात मात्र रोहितला आपली विकेट गमवावी लागली. अफगाणिस्तानच्या करिम जनातने यावेळी कर्णधार मोहम्मद नबीकरवी रोहितला झेलबाद केले. रोहितने यावेळी ४७ चेंडूंत आठ चौकार आणि तीन षटकारांसह ७४ धावांची धडाकेबाज खेळी साकारली.

रोहित बाद झाल्यावर विराट कोहली फलंदाजीला येईल, असे सर्वांना वाटत होते. पण यावेळी भारतीय संघ व्यवस्थापनाने धडाकेबाज फलंदाज रिषभ पंतला तिसऱ्या स्थानावर पाठवण्याचा निर्णय घेतला. पंतने या संधीचा चांगलाच फायदा उचलला आणि जोरदार फटकेबाजी केली. पण लोकेश राहुल मात्र यावेळी पंतला जास्त साथ देऊ शकला नाही. अफगाणिस्तानच्या गुलबदिनने राहुलला यावेळी बाद केले. राहुलने ४८ चेंडूंत सहा चौकार आणि दोन षटकारांच्या जोरावर ६९ धावा साकारल्या.



Source link

Leave a Reply

Your email address will not be published. Required fields are marked *

%d bloggers like this: