हार्दिक, भुवीला डच्चू; विराटबाबत BCCI दोन दिवसात घेणार मोठा निर्णय


नवी दिल्ली: टी-२० क्रिकेट वर्ल्ड कप संपल्यानंतर लगेचच न्यूझीलंड संघ भारत दौऱ्यावर येणार आहे. यात सुरुवातीला भारत-न्यूझीलंडदरम्यान तीन सामन्यांची टी-२० क्रिकेट मालिका होणार आहे. सतरा नोव्हेंबरपासून सुरू होणाऱ्या या मालिकेत भारतीय संघाचे नेतृत्व रोहित शर्मा करणार असल्याची दाट शक्यता आहे. त्याचबरोबर टी-२० वर्ल्ड कपमधील भारतीय संघाचे अपयश लक्षात घेता, यात नवीन चेहऱ्यांना संधी मिळण्याचीही शक्यता आहे. यासाठी भारतीय क्रिकेट नियामक मंडळातील (बीसीसीआय) पदाधिकारी आणि निवड समिती सदस्य यांच्यात पुढील दोन-तीन दिवसांत चर्चा होणार आहे. यात संघ निवड, कर्णधारपदाची नियुक्तीसह विराट कोहलीकडे वन-डे संघाचे नेतृत्व कायम ठेवायचे की नाही, यावरही चर्चा होणार आहे.

आयसीसी स्पर्धेत कर्णधार कोहली पुन्हा एकदा अपयशी ठरला आहे. कर्णधार म्हणून त्याला टी-२० वर्ल्ड कपमध्ये आपला ठसा काही उमटविता आला नाही. भारताला सलग दोन लढतींत पराभव पत्करावा लागला. वर्ल्ड कपपूर्वीच कोहलीने टी-२० संघाचे नेतृत्व सोडणार असल्याचे सांगितले आहे. आता कोहलीकडून वन-डे संघाचे नेतृत्व काढून घेण्यात येण्याची शक्यता जास्त आहे. यासाठी बीसीसीआयचे अध्यक्ष सौरभ गांगुली आणि सरचिटणीस जय शहा यांनी पुढील दोन-तीन दिवसांत निवड समिती सदस्यांसोबत ऑनलाइन बैठक बोलवली आहे. पुढील वर्षी ऑस्ट्रेलियात टी-२० वर्ल्ड कप होत असून, २०२३चा वन-डे वर्ल्ड कप भारतात होणार आहे. तेव्हा याची तयारी भारताला आताच करावी लागणार आहे. या वर्षी तरी भारतीय संघाला वन-डे सामने खेळायचे नाहीत. पुढील वर्षीही भारतीय संघाचे फारसे वन-डे सामने नाहीत. पुढील वर्षी जूनपर्यंत भारतीय संघ केवळ तीन वन-डे, तर एकूण १७ टी-२० सामने खेळणार आहे. त्यामुळे कोहलीच्या वन-डेबाबतचा निर्णय आता घ्यावा की नाही, यावरही चर्चा होईल. राहुल द्रविड भारतीय संघाचे प्रशिक्षक होणार असल्याची शक्यता जास्त आहे. यावरही या बैठकीत चर्चा होऊ शकते.

कसोटीतून रोहितची विश्रांती?

तीन टी-२० सामन्यानंतर भारतीय संघ न्यूझीलंडविरुद्ध दोन कसोटी सामने खेळणार आहे. यात कानपूर कसोटी २५ ते २९ नोव्हेंबर, तर मुंबई कसोटी ३ ते ७ डिसेंबरदरम्यान होत आहे. यातून रोहित शर्मासारखे अव्वल खेळाडू विश्रांती घेण्याची दाट शक्यता आहे. ज्यांना टी-२०साठी विश्रांती देण्यात येईल, त्यांना कसोटीत स्थान मिळण्याची शक्यता आहे. कारण खेळाडूंवरील कामाचा ताण संघव्यवस्थापनाला लक्षात घ्यावा लागेल. न्यूझीलंडनंतर भारतीय संघ दक्षिण आफ्रिका दौऱ्यावर जाणार आहे. त्याआधी खेळाडूंना पुरेशी विश्रांती मिळणे गरजेचे आहे.

पंड्या, भुवीला वगळणार?

पुढील वर्ल्ड कपसाठी अकरा महिन्यांचा कालावधी शिल्लक आहे. अशा परिस्थितीत सध्याच्या संघातील खेळाडूंचा फॉर्म आणि तंदुरुस्ती यावरही चर्चा केली जाणार आहे. या स्थितीत भुवनेश्वरकुमार आणि हार्दिक पंड्याला वगळण्यात येण्याची शक्यता आहे.

ऋतुराजला संधी

आयपीएलमध्ये चमकदार कामगिरी करणाऱ्या काही युवा खेळाडूंना न्यूझीलंडविरुद्धच्या टी-२० मालिकेत स्थान मिळण्याची दाट शक्यता आहे. यात सर्वाधिक धावा करून ऑरेंज कॅप मिळविलेला ऋतुराज गायकवाड याचे नाव आघाडीवर आहे. सर्वाधिक विकेट घेणारा आवेश खान, फिरकी गोलंदाज यझुवेंद्र चहल यांना संधी मिळू शकते. जसप्रीत बुमराह आणि महंमद शमी या प्रमुख वेगवान गोलंदाजांना विश्रांती देण्यात येऊ शकते. त्याऐवजी जम्मू-काश्मीरच्या उमरान मलिकचेही नाव चर्चेत आहे. अष्टपैलू वेंकटेश अय्यरला पंड्याच्या जागी स्थान मिळू शकते. अक्षर पटेल, श्रेयस अय्यर, दीपक चहर, शुभमन गिल, मयंक अगरवाल, उमेश यादव यांचे पुनरागमन होऊ शकते.



Source link

Leave a Reply

Your email address will not be published. Required fields are marked *

%d bloggers like this: